जेटी कप क्रिकेटप्रति आकर्षण बृद्धि भएको छ

प्रकाशित मिति :

जेटी कप क्रिकेटको तयारी कस्तो भइरहेको छ ?
कैलालीको बर्दगोरिया गाउँपालिका वडा नम्बर ४ मुडाबजारमा रहेको खेलमैदानमा भोलि (मंसिर १ गते) देखि चौथौ जेटी कप क्रिकेट प्रतियोगिता सञ्चालन हुँदैछ । प्रतियोगिताको तयारी असन्तम चरणमा पुगेको छ । प्रतियोगितामा भाग लिने टिम दर्ता कार्य पनि अन्तिम चरणमा छ । त्यस्तै, खेलमैदान मर्मत तथा पिच निर्माण कार्य पुरा भएको छ ।

एकेन्द्र मल्ल
संस्थापक, जगततारा बोर्डिङ स्कूल

प्रतियोगिता सञ्चालनका मुख्य चुनौति र समस्याबारे बताइ दिनुस् न ।
यो विद्यालय स्तरमा ठूलो धनराशि पुरस्कार भएको क्रिकेट प्रतियोगिता हो । त्यसैले चौथो जेटी कप क्रिकेट प्रतियोगिता सञ्चालनको प्रमुख चुनौति भनेकै आर्थिक व्यवस्थापन नै हो । हामीले स्कुलबाटै आर्थिक सहयोग जुटाएर प्रतियोगता सञ्चालन गर्दैछौं । यो क्रिकेट प्रतियोगिता चौथौ संस्करणसम्म आइपुग्दा लगानी झन् बढेको छ । हामीले क्रिकेट प्रतियोगिता लाभका लागि नभई क्रिकेट तथा खेलाडीको विकासमा योगदान पुर्‍याउने उद्देश्यले आयोजना गरेका हौं । चौथो संस्करणसम्म आइपुग्दा जेटी कप क्रिकेटप्रति क्रिकेटर तथा दर्शको आकर्षण निकै बृद्धि भएको छ ।

यो प्रतियोगितामा कुन कुन ठाउँका टिम सहभागी बन्दैछन् ?
चौथौ जेटी कप क्रिकेट प्रतियोगितामा कैलाली जिल्लाका २० टीम सहभागी हुँदैछन् । विगत तीन संस्करणमा धनगढीका केही विद्यालय सहभागी रहेकोमा यस वर्ष सहभागी हुने सम्भावना कम रहेको छ । जिल्लाको टीकापुर, लम्की, बौनिया, सुखड लगायतका स्थानबाट टिम सहभागी बन्नेछन् ।

चौथो संस्करणमा के कति पुरस्कार राशि रहेको छ ?
२०७२ सालमा पहिलो संस्करणमा विजेताले १० हजार रुपैयाँ पुरस्कार पाएकोमा चौथो संस्करणसम्म आइपुग्दा ६१ हजार एक सय ११ रुपैयाँ पुरस्कार पुगेको छ । त्यस्तै, उपविजेताले ३१ हजार एक सय ११ रुपैयाँ पुरस्कार प्राप्त गर्ने छ । त्यस्तै, प्रतियोगिताको उत्कृष्ट खेलाडीले तीन हजार पाँच सय रुपैयाँ तथा उत्कृष्ट बलर, उत्कृष्ट व्याट्सम्यान र उदियमान खेलाडी र प्रत्येक खेलका म्यान अफ द म्याच पुरस्कारको पनि व्यवस्था गरेका छौं ।

चौथो जेटी कप क्रिकेटमा प्रायोजन, सहयोगको अवस्था कस्तो रहेको छ ?
चौथो जेटी कप क्रिकेट प्रतियोगिताको प्रमुख प्रायोजक अक्सब्रिज पब्लिकेशन रहेको छ । त्यस्तै, बर्दगोरिया गाउँपालिकाले विगतका वर्ष झैं यस पटक पनि सहयोग गर्दै मुख्य प्रवद्र्धक रहेको छ । त्यस्तै, छिमेकी घोडाघोडी नगरपालिकाले पनि सहयोग गर्ने प्रतिवद्धता जनाएको छ । त्यसैगरी, विभिन्न पब्लिेकेशन तथा स्थानीय व्यवसायीहरूले पनि सहयोग गरेका छन् । लम्कीस्थित प्रमोद पुस्तक पसलले प्रतियोगिताको म्यान अफ द म्याचको पुरस्कार उपलब्ध गराउने प्रतिवद्धता व्यक्त गरेको छ ।

अन्त्यमा के भन्न चाहनुहुन्छ ?
चौथो जेटी कप क्रिकेट प्रतियोगितामा सहभागी बनेकोमा सबै विद्यालयमा आभार प्रकट गर्दछु । सम्पूर्ण दर्शक महानुभावहरूलाई सबै खेल हेर्न आइदिन हुन अनुरोध गर्दछु । यो प्रतियोगिता सञ्चालन गर्न प्रायोजन, सहयोग गर्नुहुने संघसंस्थाका साथै प्रत्यक्ष र अप्रत्यक्ष रूपमा सहयोग गर्नुहुने शिक्षक, व्यापारी, संघसंस्था, पत्रकार तथा आम बर्दगोरियावासीमा हृदयदेखि नै धन्यवाद व्यक्त गर्दछु ।

प्रस्तुति : पदम ओझा

    Comment Here!